Руската армија денеска го најави почетокот на третата фаза од вежбите за распоредување на нестратешко нуклеарно оружје, при што ќе се разработуваат прашањата за подготовка на единиците на вооружените сили на Руската Федерација за борбена употреба на ова оружје.
„Во согласност со одлуката на претседателот на Руската Федерација, започна третата фаза од вежбата на нестратешки нуклеарни сили“, соопшти Министерството за одбрана.
Војниците од јужниот и централниот воен округ ќе бидат обучени како да распоредуваат лажни боеви глави за оперативните и тактички ракетни системи Искандер-М и тајно да ги преместуваат на локации за лансирање, додаде Министерството.
„Сегашната фаза на вежбата е насочена кон одржување на подготвеноста на персоналот и опремата на единиците за борбена употреба на руското нестратешко нуклеарно оружје за извршување на борбени задачи“, соопшти Министерството.
Според Интерфакс, во текот на првата и втората фаза се решени прашањата за подготовка на единиците на Јужниот и Ленинградскиот воен округ, единиците на Воздухопловните сили и морнарицата за борбена употреба на нестратегиско нуклеарно оружје.
Русија ја одржа првата фаза од вежбите во мај, а Белорусија се приклучи на втората фаза во јуни.