Русија најави дека ќе ја прекине соработката со Меѓународната вселенска станица (МВС) додека не се укинат санкциите што Западот ги воведе поради воената операција во Украина.
Русија повеќе нема да работи со партнери како НАСА и Европската вселенска агенција (ЕСА) во орбиталната лабораторија, објави на социјалните мрежи шефот на Роскосмос, Дмитриј Рогозин.
ISS е последниот преостанат значаен вселенски проект на кој Русија работи со споменатите партнерски вселенски агенции, откако беа откажани други лансирања и планови.
Но, овој проект е веројатно најважниот, бидејќи Меѓународната вселенска станица е дом на многу астронаути и нејзината орбита мора постојано да се одржува за да се осигура дека нема да падне на Земјата.
Не е во сопственост на една нација и е „програма за соработка“ меѓу Европа, САД, Русија, Канада и Јапонија, според Европската вселенска агенција (ESA).
Во март, Рогозин апелираше до вселенските агенции ширум светот, барајќи од нив да ги укинат санкциите за компаниите од руската ракетна и вселенска индустрија со цел да се гарантира продолжување на работата на ISS. Тој наложи рок до крајот на месецот.
Соработката на астронаутите на станицата е од витално значење за нејзиното функционирање, но шефот на Роскосмос сепак нагласи дека ги смета за неприфатливи санкциите наметнати од Западот.
Тој рече дека рокот за завршување на заедничката работа ќе биде доставен до руското раководство.