Новиот американски амбасадор во Русија, Лин Трејси, ќе пристигне во Москва во наредните денови, изјави денеска рускиот заменик министер за надворешни работи Сергеј Рјабков.
Рјабков рече дека сегашната ситуација не е погодна за одредување нов датум за седница на руско-американската консултативна комисија за Договорот за намалување и ограничување на стратешкото офанзивно оружје Нов СТАРТ.
„Сегашната ситуација е обесхрабрувачка за одредување нов датум, особено имајќи го предвид трендот на ескалација на американските акции и реторика“, нагласи Рјабков, пренесе ТАС С.
Претходниот американски амбасадор во Русија, Џон Саливан, ја напушти Москва по завршувањето на неговиот мандат на 4 септември минатата година, а беше назначен за амбасадор во Русија во декември 2019 година.
Последниот состанок на консултативната комисија за Нов СТАРТ се одржа во октомври 2021 година.
На почетокот на август минатата година, Русија објави дека ги откажува американските инспекции, закажани на нејзините воени локации како дел од Договорот Новиот СТАРТ, наведувајќи дека ова е одговор на американското спречување слични руски инспекции во САД.
Новиот договор СТАРТ беше потпишан во 2010 година и го ограничува арсеналот на двете земји на максимални 1.500 нуклеарни боеви глави, што е намалување за речиси 30 отсто во однос на претходната граница, поставена во 2002 година.
Договорот го ограничува и бројот на проектили и тешки бомбардери на 800.
Во јануари 2021 година, рускиот претседател Владимир Путин го продолжи договорот на пет години, до 2026 година.