Низок е процентот на деца и воспитувачи во градинките кои се ставени во изолација што значи дека протоколите се почитуваат, а исто така низок е и ризикот кај деца под шест години. Тоа е забележливо и во статитстиката кај нас, но и во светот, реле министерот за здравство Венко Филипче.
Исклучително е важно, нагласи тој, воспитувачите и другите што се во контакт со децата да се штитат и надвор од работното место бидејќи заболувањсата се случуваат најчесто надвор, но засега нема внатрешна трансмисија на вирусот.
– За училиштата е многу рано да се извлекуваат заклучоци зашто не се поминати две недели од почетокот на учебната година. Според првичните информации од Институтот за јавно здравје и Министерството за образование и наука, координацијата и постапувањето согласно протоколите е добра, но со оглед дека е почнат есенски бран, се потврдува дека е исправна одлуката за онлајн-настава зашто тоа значи сериозно намалување на ризикот од вирусот во претстојниот период, истакна Филипче.
Поврзано
- Филипче: Секој што ќе излезе од дома ќе мора да носи маска
- Ако е потребно повторно ќе се воведе полицискиот час, но засега не
- Нови мерки и забрани ќе препорача Комисијата за заразни болести
- Филипче: Викендот без ДДВ не е ризик по здравјето, има протоколи, а граѓаните треба да носат маски и да држат дистанца
Тој посочи дека првичните информации кои денеска ги соопшти МОН потврдуваат оти во изолација се 53 ученици и осум наставници. Во сите училишта каде што има позитивни случаи на настава со физичко присуство, рече Филипче, се постапува навремено согласно со протоколите и алгоритмите во соработка со локалните центри за јавно здравје.
За ОУ „Гоце Делчев“ во Центар, каде што вкупно 39 првачиња се во изолација (17 вчера и нови 22 денеска) на прашање дали ако носеле маски и биле на растојание треба да се во изолација сите деца во одделението, министерот одговори дека според усвоениот алгоритам за постапување во градинките и училиштата, епидемилогот има слобода во работата за да го процени ризикот и врз основа на тоа да даде препораки.
– Значи, апсолутно не е задолжително целиот клас или група, ако се работи за градинка, да оди во изолација, но епидемиологот е тој кој го проценува ризикот, одговори Филипче.
На прес-конференцијата министерот соопшти нови предлог-мерки поради високиот број новозаразени кои вчера и денеска се над 300 (317 и 364). Децата до шест години се исклучок од предложената мерка за задолжително носење заштитна маска надвор од дома.
Хатка Смаиловиќ