Републиканските гласачи во американската сојузна држава Јужна Каролина денеска ќе го изберат својот претседателски кандидат меѓу Доналд Трамп и поранешната гувернерка Ники Хејли, каде убедливата победа на фаворизираниот поранешен претседател може да значи крај на трката.
Трамп досега победи на изборите во Ајова, Њу Хемпшир и Невада, но Хејли тврди дека останува во трката „до последното гласање“ бидејќи е убедена дека Трамп не може да го победи демократскиот кандидат, актуелниот претседател Џо Бајден на ноемвриските избори.
Како потомок на имигранти од Индија, Хејли служеше како гувернер на Јужна Каролина шест години, по што се приклучи на администрацијата на Трамп и во 2017 година стана амбасадор на САД во ОН.
Таа не е непопуларна во нејзината држава, но Трамп е многу попопуларен.
Повеќето аналитичари сметаат дека Хејли ќе се збогува со кандидатурата во случај на тежок пораз во родната држава.
Просекот на сите анкети покажува дека Трамп има поддршка од 63 отсто од републиканците во Јужна Каролина, додека Хејли има поддршка од само 33 отсто.
Таа на крајот може да смета на поддршката од независните и демократски гласачи кои можат да учествуваат на прелиминарните избори на Републиканската партија, доколку претходно не учествувале на демократските прелиминарни избори.
Одлучувачки избори
Само четири отсто од сите регистрирани гласачи во Јужна Каролина учествуваа на официјалните демократски прелиминарни избори во Јужна Каролина на 3 февруари, а Бајден победи.
Пред изборите, кои може да бидат одлучувачки, кандидатите вербално се нападнаа.
Трамп често го навредува својот противник велејќи дека има мозок на птица, а Хејли фрла сомнеж во менталните и физичките способности на Трамп и жестоко ги критикува неговите изјави за надворешната политика, особено за НАТО, и недостатокот на поддршка за Украина.
По Јужна Каролина, следните прелиминарни избори на републиканците и демократите се одржуваат во вторник во Мичиген, а потоа следува Супер вторник, на 5 март, кога гласаат 14 држави.
Конвенцијата на Републиканската партија за потврдување на претседателскиот кандидат ќе се одржи од 15 до 18 јули во Милвоки, а Конвенцијата на Демократската партија од 19 до 22 август во Чикаго.