Американскиот претседател Доналд Трамп изјави дека рускиот претседател Владимир Путин „нема да нападне“ територија на НАТО, со што ги оспори медиумските извештаи дека Вашингтон е загрижен за евентуален руски потег во Европа.
„Имав добри разговори со него. Тој нема да нападне територија на НАТО“, им рече Трамп на новинарите во Овалната соба во четврток кога беше прашан дали рускиот претседател се согласил да не го стори тоа.
Два дена претходно, директорот на ЦИА, Џон Ратклиф, отпатува во Москва на ненадејни разговори за кои „Волстрит џурнал“ и „Си-Би-Ес њуз“ рекоа дека се обид да се одврати Русија од напаѓање на членките на НАТО, по проценките на американските разузнавачки служби дека Москва може да се обиде да го тестира алијансата.
Нема коментар за заминувањето на шефот на ЦИА во Москва
Замолен да ги потврди извештаите за тоа како Ратклиф го пренел предупредувањето до Русите, Трамп рече: „Не сакам да коментирам за тоа, но тие нема да нападнат“.
Трамп, исто така, ја намали важноста на разговорите во Москва, сугерирајќи дека тие биле за Украина.
Тој ги отфрли извештаите дека Ратклиф го споменал НАТО или американската кампања за притисок врз Иран, пишува Euro News.
„Тој е таму, многу полурутински. Мразам да ги разочарам луѓето. Би сакале да видиме крај на војната со Украина“, рече Трамп во интервју со конзервативниот радио водител Глен Бек.
Порано во четврток, шефот на руската служба за надворешно разузнавање, Сергеј Наришкин, исто така го намали значењето на состанокот со својот колега од ЦИА.
„Да, состанокот се одржа, но нема ништо необично во него“, рече Наришкин, како што објави руската државна новинска агенција ТАСС.
Тој рече дека двајцата разговарале за „низа прашања што спаѓаат во делокругот на разузнавачките служби“, опишувајќи го како „прилично деликатно и посебно прашање“.
Функционер на ЕУ: „Нема ризик од напад од страна на Русија“
Во Брисел, висок функционер на ЕУ, зборувајќи под услов да остане анонимен, рече:
„Европските служби генерално не гледаат никаков ризик од напад на Русија врз европските земји и таа проценка не е променета. Кога станува збор за каква било закана за европските членки на НАТО, не гледаме никаква проценка дека нешто од тоа се подготвува сега.“
Трамп, исто така, ја отфрли потребата од казнување на Русија поради трговијата со нејзиниот сојузник Иран, откако неговата администрација објави „економски ден Д“ насочен кон Техеран ако одбие да го отвори Ормутскиот теснец.
„Досега, мислам дека Русија се однесуваше доста добро што се однесува до Ормутскиот теснец“, рече американскиот претседател.