Рускиот претседател Владимир Путин му порача на севернокорејскиот лидер Ким Џонг Ун дека двете земји ќе продолжат да го зајакнуваат сеопфатното стратешко партнерство, објави денес KCNA.
Путин го изјави ова во својата честитка до Ким по повод 78-годишнината од основањето на Демократска Народна Република Кореја, објави РИА Новости.
„Без сомнение, ќе продолжиме со најблиската заедничка соработка за понатамошно зајакнување на сеопфатното стратешко партнерство меѓу нашите земји“, истакна Путин.
Претседателот на Русија изјави дека односите меѓу Москва и Пјонгјанг „отсекогаш се темелеле на принципите на пријателство, добрососедство и меѓусебна помош“.
Во јуни 2024 година, Путин и Ким го потпишаа Договорот за сеопфатно стратешко партнерство меѓу Русија и Северна Кореја, кој стапи во сила на 4 декември истата година по размената на ратификациски инструменти.
Член 4 од тој договор предвидува дека другата страна веднаш ќе обезбеди воена и друга помош со сите расположливи средства ако една од државите е изложена на вооружен напад од друга држава или неколку држави и се најде во воена состојба.
Таквата помош се обезбедува во согласност со член 51 од Повелбата на Обединетите нации и законите на Русија и Северна Кореја, според агенцијата.