Британската влада потрошила 161,7 милиони фунти (204 милиони долари) за државниот погреб на кралицата Елизабета Втора, објави Министерството за финансии.
Откако кралицата Елизабета почина на 8 септември на 96-годишна возраст, земјата прогласи десетдневна жалост, која заврши со погребот на 19 септември.
Околу 250.000 луѓе го посетија ковчегот, кој беше изложен во Вестминстерската сала, за да ѝ оддадат почит на најдолговечната кралица.
„Приоритет на Владата беше настаните поврзани со погребот да се одвиваат непречено и со соодветна доза на достоинство, како и безбедноста на граѓаните да биде загарантирана во секое време“, напиша министерот за финансии Џон Глен во писмото до парламентот.
Најголем дел од парите добил МВР, надлежно за одржување на редот и националната безбедност – 73,7 милиони фунти.
Полицијата на Сити Лондон го распореди својот најголем број полицајци досега на улиците, велејќи дека тоа е нивната најголема безбедносна операција во историјата.
На погребот се собраа многу светски лидери и монарси. Полициското обезбедување беше посилно отколку на Олимписките игри во 2012 година и на прославата на платинестиот јубилеј на кралицата.