Два силни земјотреси ги погодија Соломонските Острови, меѓу оштетените згради беа австралиската амбасада и аеродромот, а главниот град Хонијара остана без струја.
Првиот земјотрес, на длабочина од 15 километри, погоди област на околу 16 километри југозападно од Маланг, соопшти Американскиот геолошки институт, кој првично ја процени неговата јачина на 7,3 степени, пред да ја намали на 7,0.
Вториот земјотрес, со јачина од 6 степени, го погоди истото подрачје 30 минути подоцна.
– Засега нема повредени, но се урнал покривот на зградата на високиот совет, што укажува дека веројатно има поголема штета во целиот град – изјави во парламентот австралискиот премиер Ентони Албанес. Меѓународниот аеродром Хонијара претрпел оштетувања на таванот, но зградата е недопрена, изјави официјален претставник на авиокомпанијата Solomon Islands Airline.
Сè уште се чувствуваат последователни потреси, додаде тој, не сакајќи да биде именуван бидејќи не е овластен да зборува јавно.
Персоналот на аеродромот ќе продолжи да работи, но оштетениот дел од терминалот е затворен за патници.
Соломон тајмс објави дека поголемиот дел од Хонијара е без струја и дека се прават прелиминарни проценки за оштетување на далноводите.
Метеоролошката служба на Соломонските Острови соопшти дека нема опасност од цунами, но предупреди на невообичаени морски струи.
– На луѓето им се советува и да внимаваат бидејќи се очекува дополнително тресење на земјата – изјави вработен на социјалните мрежи.
Снабдувањето со електрична енергија беше прекинато на голем дел од островот, а радиодифузната корпорација на Соломонските острови на Фејсбук објави дека се исклучени сите радио услуги.