Пјонгјанг го критикуваше неодамнешниот состанок на Советот за безбедност на Обединетите нации за ситуацијата со човековите права во Северна Кореја, тврдејќи дека САД ја искористиле меѓународната организација за да се движат против Пјонгјанг, објави денеска севернокорејската државна новинска агенција КЦНА.
KCNA цитираше неименуван портпарол на севернокорејскиот истражувачки центар за човекови права, кој рече дека Пјонгјанг ги отфрла, како што вели, „клеветите“ на САД и нивните следбеници за досиејата за човековите права на Северна Кореја и дека ќе го брани суверенитетот на земјата, социјалистичкиот систем и нејзината безбедност и интереси.
Кина, главниот сојузник на Пјонгјанг, се спротивстави на состанокот на ОН за ситуацијата со човековите права во Северна Кореја, но не се обиде да го блокира, објави Ројтерс.
Советот за безбедност на ОН во четвртокот разговараше за кршењето на човековите права во Северна Кореја, при што американската амбасадорка во ОН Линда Томас Гринфилд го критикуваше севернокорејскиот лидер Ким Џонг Ун за развој на нуклеарно оружје и ракети, како и за репресија.
Американскиот претседател Џозеф Бајден и лидерите на Јужна Кореја и Јапонија се договорија на состанокот во петокот во Кемп Дејвид трите земји да ја продлабочат воената и економската соработка во услови на зголемена кинеска моќ и нуклеарни закани на Северна Кореја.
Тие, исто така, се согласија трите земји да одржуваат годишни воени вежби и да споделуваат информации во реално време за лансирањето на севернокорејските ракети до крајот на годината.
Сите информации поврзани со најновите случувања во Северна Кореја можете да ги прочитате ТУКА.