Обединетите нации објавија извештај за кинескиот регион Ксинџијанг кој укажува на можни „злосторства против човештвото“ и „веродостојни докази“ за тортура и сексуално насилство врз заедницата на малцинството Ујгур.
Во извештајот се наведува дека произволното и дискриминаторско приведување на Ујгурите и другите членови на претежно муслиманските групи може да се третира како злосторство против човештвото и се повикува меѓународната заедница да дејствува.
„Постојат веродостојни наводи за тортура или малтретирање, вклучително и принуден медицински третман и лоши затворски услови, како и индивидуални наводи за сексуално и родово насилство“, се наведува во извештајот на Канцеларијата на Високиот комесаријат на ОН за човекови права, јавува Бета.
Овој документ става печат на ОН на обвинувањата кои веќе подолго време се упатуваат против кинеските власти.
Америка и некои невладини организации за човекови права притискаа извештајот да биде објавен, додека Пекинг го направи спротивното, сметајќи го за „фарса“ оркестрирана од Западот на чело со Вашингтон.