Речиси осум милиони луѓе во Јужен Судан, или две третини од населението, се изложени на ризик од несигурност на храна и глад, предупредија Обединетите нации во извештајот објавен во четвртокот.
„Гладот и неухранетоста се во пораст во делови од Јужен Судан погодени од поплави, суша и конфликти, а некои заедници се изложени на ризик од глад доколку се прекине хуманитарната помош и не се зајакнат мерките за климатска адаптација“, се наведува во извештајот, според Хина.
Во заедничкиот извештај на Организацијата за храна и земјоделство на ОН (ФАО), Детскиот фонд на ОН (УНИЦЕФ) и Светската програма за храна (WFP) се наведува дека бројот на луѓе изложени на ризик од повисоки нивоа на несигурност и неухранетост „никогаш не бил поголем“, па дури и го надминува нивото забележано за време на конфликтите во 2013 и 2016 година.
Според извештајот, на 7,76 милиони луѓе им се заканува акутна несигурност во храната во периодот пред новата жетва, од април до јули 2023 година, а 1,4 милиони деца ќе бидат неухранети.
Тешка ситуација
За ваквата состојба се виновни конфликтите, лошите макроекономски услови, екстремните климатски настани, наглото поскапување на храната и горивото и падот на финансирањето на хуманитарните програми, велат авторите.
„Јужен Судан е на првата линија на климатската криза и семејствата секојдневно ги губат домовите, добитокот, полињата и надежта поради екстремните временски услови“, рече Макена Вокер, привремен директор на WFP за Јужен Судан.
„Ако успееме да воспоставиме мир во земјата, особено во областите каде што моментално има тензии, (…) го надминавме половина пат во решавањето на проблемот со безбедноста на храната, така што консолидирањето на мирот е наша главна задача“, рече суданската министерка за земјоделство и безбедност на храна Жозефина Лагу во четвртокот, на презентација на извештајот.
Во 2017 година, глад беше прогласен во Јужен Судан во окрузите Лееру и Мајендито во државата Унити, кои често беа место на конфликти.
Јужен Судан, најмладата земја во светот, е зафатен од крвави конфликти, природни катастрофи, економска криза и постојана борба за власт откако се стекна со независност од Судан во 2011 година.
Речиси 400.000 луѓе загинаа во петгодишната граѓанска војна што заврши во 2018 година.