Три члена од исто семејство починаа откако западнаа во неволја во морето кај Шорхам во Сасекс, Англија.
Четврто лице, помлада девојка, беше однесено во болница и е во критична состојба, објавува Metro.co.uk.
Итни служби беа повикани на плажата Кингстон околу 15 часот откако рибарите пријавија дека виделе четири лица во морето како се борат да останат над површината.
Полицијата во Сасекс потврди дека меѓу загинатите се маж, жена и тинејџерка.
Сите четири члена на семејството биле извлечени на брегот, а полицијата изјави дека се странски државјани.
Помладата девојка била однесена во болница во критична состојба, потврди началникот на полицијата во Сасекс, Џејмс Колис.
Бројни итни служби пристигнаа на местото на трагедијата
RNLI, британската организација за спасување на море, соопшти дека нејзините екипи стапиле во акција околу 14:50 часот. Кратко по 15 часот, уште два чамци за спасување биле распоредени од станицата во Брајтон.
Бројни екипи за итни случаи пристигнаа на местото на настанот, а беа ангажирани и хеликоптери на службата за итна медицинска помош.
Крајбрежната стража соопшти дека одговорила на пријавата за инцидентот во Шорхам околу 14:45 часот.
„Хеликоптерот на крајбрежната стража беше испратен, како и спасувачките екипи на крајбрежната стража од Литлхемптон, Шорхам и Њухејвен и чамец за спасување на RNLI од Шорхам“, рекоа тие.
Крајбрежната стража не бара други лица.
Трагедијата се случила додека Гари и Викторија Флинт го поминувале денот на плажа со своите деца.
Викторија од Хоршам рече дека пристигнале на плажата околу 15 часот.
„Кратко потоа ја слушнавме сирената на чамецот за спасување. Го гледавме како отпловува и околу 20 минути подоцна се врати“, рече таа.
„Почнаа да пристигнуваат амбулантни возила – сè повеќе и повеќе – а потоа пристигнаа хеликоптери на Итна медицинска помош.“
Полицијата и крајбрежната стража продолжуваат да ги утврдуваат околностите на трагедијата.