Извршниот одбор на Меѓународниот монетарен фонд (ММФ) во понеделникот одобри исплата на 900 милиони долари на Украина од програмата за заем од 15,6 милијарди долари, неколку часа пред шефот на ММФ Кристалина Георгиева да се сретне со украинскиот претседател Володимир Зеленски, пренесува Ројтерс.
Георгиева одржа речиси едночасовен состанок со Зеленски во седиштето на ММФ во Вашингтон и му кажа дека Извршниот одбор на ММФ е едногласен во поддршката за Украина, освен за една земја, рекоа претставници на ММФ, јасно мислејќи на Русија.
Одборот го одобри договорот постигнат минатиот месец со украинските власти по вториот преглед на напредокот на Киев за четиригодишниот заем од Продолжениот фонд (ЕФФ) одобрен претходно оваа година.
Ова го отвора патот за исплата на 900 милиони долари, со што вкупните средства на ММФ за Украина ќе достигнат 4,5 милијарди долари оваа година.
– ЕФФ продолжува да биде силно сидро за економската програма на властите во Украина, а нејзината имплементација е главно на вистинскиот пат и покрај исклучително предизвикувачките околности – се вели во соопштението на ММФ.
Георгиева рече дека економијата на Украина се покажала отпорна и покрај руската инвазија која започна во февруари 2022 година и „огромните социјални и економски трошоци“ што таа ги предизвика.
– Гледајќи кон иднината, иако се очекува закрепнувањето да продолжи, постојат значителни ризици кои произлегуваат главно од екстремно високата неизвесност поврзана со војната – се вели во изјавата на Георгиева.
Исто така, како што додаде таа, „клучно е надворешното финансирање под концесиски услови да продолжи на навремена и предвидлива основа“.
Од почетокот на војната, Украина добила повеќе од 68,5 милијарди долари буџетска поддршка, покажуваат податоците на Министерството за финансии на земјата.
Сите информации поврзани со најновите случувања со војната во Украина можете да ги прочитате ТУКА.