Американскиот претседател Доналд Трамп денеска ѝ понуди поддршка на лидерката на француската екстремна десница Марин Ле Пен, откако парискиот суд ја осуди неа и дваесетина луѓе од нејзината партија Национален собир (РН) за проневера на средства од Европската унија, а неговата објава ја сподели и Илон Маск.
„Ослободете ја Ле Пен!“ – додаде тој во својот пост на X.
Судијата ѝ забрани на Ле Пен пет години да се кандидира на избори, што ќе ја спречи да учествува во претседателската трка во 2027 година, освен ако пред тоа не може да поднесе жалба на одлуката.
Судијата сега е под полициска заштита откако добил смртни закани, изјави завчера извор за Ројтерс.
Ле Пен, нејзините партиски сојузници и поддржувачи го обвинија судот за мешање во демократијата, а францускиот премиер Франсоа Бајру пред три дена им рече на пратениците дека „безусловно го поддржува“ судството.
Трамп: Ми звучи како книговодствена грешка
Во објава на Truth Social доцна синоќа, Трамп го нарече случајот против Ле Пен „лов на вештерки“ и ја пофали лидерката на екстремната десница.
„Таа претрпе загуби, но продолжи, а сега, непосредно пред нешто што би било голема победа, се фати со помал прекршок за кој веројатно не знаела. Мене ми звучи како книговодствена грешка“, напиша Трамп во објавата.
Активистите за човекови права правеа споредби меѓу Ле Пен и Трамп во текот на годините за нивните антиимигрантски ставови и антималцинската реторика.
Пресудата на францускиот суд претставува пречка за 56-годишната Ле Пен, а до осудата била фаворит во анкетите во пресрет на претседателските избори.
„Одлуката ќе има спротивен ефект“
Милијардерот и близок соработник на американскиот претседател Доналд Трамп, Илон Маск, пред неколку дена ја нападна пресудата на францускиот суд, со која на лидерката на француската екстремна десница, Марин Ле Пен ѝ се забранува да се кандидира на претседателските избори.
„Кога радикалната левица не може да победи на демократски избори, таа го злоупотребува правосудниот систем за да ги затвори своите противници“, рече Маск.
„Тоа е стандардна шема за нив во целиот свет“, додаде тој и рече дека пресудата ќе има спротивен ефект, како во случајот со Доналд Трамп.