Шефот на руската дипломатија Сергеј Лавров во Хавана ја осуди „доминацијата и хегемонијата“ на САД и западните земји над светскиот поредок.
Лавров ова го изјави на првиот ден од неговата турнеја низ земјите од Латинска Америка, во чии рамки, покрај Куба, ќе ги посети и Венецуела и Бразил.
Тие „сакаат да ја зачуваат својата доминација, нивната хегемонија и нивниот диктат“ и прибегнуваат кон средства што „не вклучуваат дипломатија, туку уцени, ултиматуми, закани, употреба на воена сила и санкции“, рече Лавров на средбата со својот кубански колега. Бруно Родригез.
По политиката на отвореност кон Куба иницирана од демократскиот претседател на САД, Барак Обама, кој беше на чело на земјата од 2009 до 2017 година, следниот претседател, републиканецот Доналд Трамп, го заостри трговското и финансиското ембарго воведено во 1962 година.
Актуелниот демократски претседател Џозеф Бајден не ја промени политиката на неговиот претходник Трамп.
Русија, од друга страна, е цел на зголемени санкции од западните земји поради нејзината инвазија на Украина која започна во февруари 2022 година.
Кубанскиот министер за надворешни работи му посака добредојде на Лавров, нарекувајќи го „близок сојузник“.
Лавров разговараше и со кубанскиот претседател Мигел Дијаз-Канел за „охрабрување на билатералните односи за прашања од заеднички интерес и за важни прашања од меѓународната агенда“, беше соопштено во Хавана.
По Куба, рускиот министер ќе отпатува за Венецуела, па во Бразил, каде ќе учествува на состанокот на министрите за надворешни работи на Г20.
Тоа е втора посета на Лавров на Куба за помалку од една година.
Куба и Русија станаа многу блиски откако претседателот Дијаз-Канел ја посети Москва на крајот на 2022 година, каде што се сретна со Владимир Путин.
Двете земји имаат потпишано повеќе договори за економска соработка.
Според официјалните руски податоци, во текот на 2022 година трговската размена меѓу двете земји изнесувала 450 милиони долари.
Ова зближување со Москва доаѓа додека Куба се соочува со најголемата економска криза во последните триесет години.
За време на посетата во април, Лавров и се заблагодари на Куба за нејзиното „разбирање“ во врска со војната во Украина.
Хавана, која повика на преговарачко решение на конфликтот, не ја осуди руската офанзива.