Кубанскиот претседател Мигел Дијаз-Канел предупреди дека секоја воена акција на Соединетите Американски Држави против Куба ќе доведе до „крвопролевање“ со непроценливи последици за регионалниот мир и стабилност.
„Куба не е закана“, напиша Дијаз-Канел во објавата на социјалната мрежа Х.
Неговите коментари уследија по извештајот на Аксиос објавен во неделата, во кој се наведуваат доверливи разузнавачки информации дека Куба набавила повеќе од 300 воени дронови и разговарала за плановите да ги искористи за напад на американската поморска база во Гвантанамо, американски воени бродови и Ки Вест, Флорида.
Кубанскиот министер за надворешни работи Бруно Родригез во посебна објава изјави дека Куба, „како и секоја земја во светот“, има право на легитимна самоодбрана од надворешна агресија во согласност со Повелбата на Обединетите нации и меѓународното право.
Тој додаде дека оние кои сакаат да ја нападнат Куба користат лажни изговори за да ги оправдаат таквите потези.
Куба, долгогодишен комунистички противник на Вашингтон, се соочи со зголемен притисок откако Соединетите Држави го прекинаа снабдувањето со енергија за земјата во јануари по апсењето на претседателот на тогашната сојузничка Венецуела, пишува Гардијан.
Куба остана без гориво во последните недели, додека електричната енергија е достапна само за еден или два часа дневно во многу области.
Тензиите меѓу двете земји дополнително се зголемија во последните денови.
Во петокот се појавија извештаи дека американските обвинители планираат да го обвинат поранешниот кубански лидер Раул Кастро за соборувањето на двата авиони во 1996 година на хуманитарната група Браќа за спасување.
Ваквото обвинение против 94-годишниот Кастро би претставувало значителна ескалација на притисокот на администрацијата на американскиот претседател Доналд Трамп врз Куба, додека Вашингтон ја опишува владата на островот како корумпирана и неспособна и инсистира на промени.