Градоначалникот на Киев Виталиј Кличко изјави дека на Украина ѝ е потребна меѓународна помош за обнова за „да изгради европска иднина одвоена од авторитарната и диктаторска Русија на Владимир Путин“.
Кличко, градоначалник на Киев од 2014 година, рече дека главен приоритет на Украина е да победи во војната, но дека долгорочна цел е обнова на земјата, пишува Гардијан.
Кличко се надева дека реконструкцијата ќе помогне да се вратат милионите луѓе кои ги напуштија своите домови.
– Нашиот следен чекор е реконструкција на земјата и спроведување на бројни реформи за да бидеме во Европа по квалитет на живот, не само географски, рече градоначалникот на Киев.
„Путин ја започна инвазијата затоа што Украина сака да биде независна, слободна и демократска земја“
Кличко вели дека желбата на Украина да биде независна, слободна и демократска земја е причината зошто Путин ја започна инвазијата.
„Причината за оваа бесмислена војна е нашата желба да бидеме дел од европското семејство, со европски квалитет на живот, со вредности – човекови права, слобода на печатот, демократски вредности. Русија никогаш не го прифати ова бидејќи ја сметаат Украина за дел од руската империја. Не сакаме да се вратиме во СССР“, изјави Кличко за Гардијан.
Кличко зборуваше за Гардијан пред денешната голема конференција за обнова на Украина во Берлин, која ќе ја отворат германскиот канцелар Олаф Шолц и претседателката на Европската комисија Урсула фон дер Лајен.
Тој рече дека Украина нема желба да биде контролирана од Москва.
„Русија полека се движи во правец на Северна Кореја. Се надевам дека Украина ќе ги следи Полска, Унгарија и другите централноевропски земји на патот кон поголем просперитет и европска интеграција“, изјави градоначалникот на Киев.
„Украинците се толку мотивирани затоа што ги бранат своите домови“
Киев се соочува со најтешката зима во последните 30 години. Кличко, кој е одговорен за снабдување на главниот град со греење, енергија и вода, вели дека уличните светилки навечер се исклучуваат за да се заштеди енергија.
Тој рече дека им треба помош во одбраната на украинските електрани.
„Пред сè, ни треба најдоброто оружје“, рече Кличко, наведувајќи ги системите за противвоздушна одбрана и противракетните системи за заштита на украинското небо од руски ракети и дронови.
Кличко рече дека е благодарен за поддршката од Берлин, истакнувајќи ја финансиската и политичката помош на Германија.
„Никогаш не е доволно додека имаме војна во Украина. Кога последниот руски војник ќе ја напушти Украина, ќе кажам благодарам и ќе кажам доста е. Но сега мора да продолжиме. Главната работа е волјата за победа, важна е мотивацијата. Ние сме толку мотивирани затоа што ги браниме нашите семејства, својот дом. За разлика од тоа, руската армија се бори за пари. Од нас зависи дали ќе ги истераме Русите од Украина, од нашата територија“, рече Кличко во интервју за Гардијан.
Сите информации поврзани со најновите случувања со војната во Украина можете да ги прочитате ТУКА.