Американскиот државен секретар Марко Рубио изјави дека посетата на кинескиот претседател Си Џинпинг на САД е закажана за септември.
„Очекуваме посетата да се одржи во септември“, изјави Рубио пред новинарите пред неговото патување на состанокот на министрите за надворешни работи на АСЕАН во Манила, според Блумберг.
Тој рече дека Кина сè уште ги испраќа своите тимови кои ја подготвуваат посетата.
„Не сум слушнал ништо спротивно“, рече тој.
Трамп минатата недела ги обвини кинеските власти за мешање во претседателските избори во САД во 2020 година со кражба на 220 милиони записи од гласачи, иако американските разузнавачки служби претходно ги отфрлија тврдењата како неосновани.
Кога беше прашан дали Пекинг ќе се соочи со последици за наводните активности, Трамп вчера рече дека ќе се сретне и ќе разговара со нив.
„Дипломатијата на ниво на шефови на држави има незаменлива улога во стратешката насока на билатералните односи“, изјави портпаролот на кинеското Министерство за надворешни работи, Лин Џиен, на редовната прес-конференција во Пекинг.
Тој рече дека двете страни одржуваат комуникација во врска со средбите на двајцата лидери во текот на оваа година.
Според агенцијата, самитот на АСЕАН оваа недела ќе му даде можност на Рубио да се сретне со кинескиот министер за надворешни работи Ванг Ји, како и со други регионални претставници, вклучувајќи ги и претставниците на Јапонија и Јужна Кореја, пред состанокот меѓу двајцата претседатели.
„Кога имате две големи и моќни земји како Соединетите Американски Држави и Кина, секогаш ќе има прашања околу кои има несогласувања“, рече Рубио, според Танјуг.
Тој изјави дека смета оти е одговорност на важните и моќни земји како САД и Кина да го продолжат дијалогот и да ги одржуваат меѓусебните односи.