Украинските војници го зазедоа селото Андриевка, кое беше под руска контрола, во близина на градот Бахмут на истокот од земјата, соопштија воените власти на Киев.
„За време на јуришните операции беше заробена Андријивка во регионот на Доњецк“, се вели во денешниот извештај на Генералштабот на украинските вооружени сили, пренесува Ројтерс.
Андријевка се наоѓа јужно од Бахмут, местото на една од најкрвавите битки од почетокот на рускиот напад врз Украина во февруари минатата година.
Генералштабот, исто така, објави „делумен успех“ во близина на друго село јужно од градот, Клишчијевка.
Високи воени претставници во Киев тврдат дека Украина им нанесува големи загуби на руските сили на јужниот фронт во обид да ја врати територијата во близина на Бахмут.
Украинските извештаи зборуваат за борби во многу делови на источниот фронт, но без потврда за значителни пробиви во тримесечната контраофанзива, пренесува Ројтерс.
Напредокот на Украина е многу побавен од минатата година, кога Киев ја поврати територијата на североисток, а украинскиот претседател Володимир Зеленски и другите официјални претставници ги отфрлаат западните критики дека тримесечната офанзива е премногу бавна и попречена од стратешки грешки како што е погрешното распоредување на војниците.
Руското Министерство за одбрана објави дека руските сили одбиле осум напади во области јужно од Бахмут.
Заменик-министерката за одбрана на Украина Хана Маљар изјави дека украинските сили зазеле три села јужно од Бахмут, вклучително и Андријивка.
„Таму е постигнат напредок“, објави Маљар на Телеграм.
Руските сили го зазедоа Бахмут во мај по неколкумесечни борби кои го оставија градот во урнатини.
Оттогаш, украинските сили ги напаѓаат руските позиции, особено јужно од Бахмут.
Маљар не ги спомна градовите Авдијевка и Маринка, појужно во регионот на Доњецк, еден ден откако таа рече дека и двата биле под тешки руски напади.
На јужниот фронт, каде што украинските сили се фокусираа на заземање повеќе села при нивното напредување кон Азовското Море, Маљар рече дека руските војници претрпеле „значителни загуби“ за време на нападите врз важни градови, пренесува Танјуг.
Руските жртви, рече Маљар, „значително ја намалуваат нивната способност да се одбранат“, пренесува Ројтерс.
Сите информации поврзани со најновите случувања со војната во Украина можете да ги прочитате ТУКА.