Администрацијата на американскиот претседател Доналд Трамп во петокот му соопшти на Конгресот дека ќе ги елиминира речиси сите преостанати работни места во Американската агенција за меѓународен развој (УСАИД) и ќе ја затвори агенцијата која е клучен инструмент за зајакнување на американското влијание и испраќање хуманитарна помош низ светот повеќе од 60 години.
На персоналот на УСАИД во интерен меморандум им беше кажано дека сите позиции кои не се предвидени со закон ќе бидат елиминирани во јули и септември.
Меморандумот, разгледан од Ројтерс, беше испратен до персоналот од Џереми Левин, вршител на должноста заменик-администратор на владината агенција за ефикасност на милијардерот Илон Маск, која се справува со кратењата на работните места.
Соопштението дојде истиот ден кога силен земјотрес ги погоди Тајланд и Мјанмар, уривајќи згради и убивајќи голем број луѓе.
УСАИД со години игра голема улога во координирањето на помошта при катастрофи.
Во белешката, Левин рече дека целиот персонал на агенцијата ширум светот наскоро ќе добие е-пошта со известување дека нивните работни места се елиминирани.
Вработените ќе имаат избор дали ќе бидат отпуштени на 1 јули или на 2 септември, се наведува во писмото.
Во текот на следните три месеци, Стејт департментот ќе ја преземе преостанатата „програма на УСАИД за спасување животи и стратешка помош“, се вели во меморандумот, додавајќи дека персоналот на УСАИД нема автоматски да биде префрлен во одделот, кој ќе спроведе „одделен и независен процес на вработување“.
На првиот ден од враќањето во Белата куќа, Трамп нареди 90-дневно замрзнување на целата американска странска помош и преглед на програмата за да се утврди дали програмите за помош се усогласени со политиките на неговата администрација.
Тој тврдеше, без да покаже никакви докази, дека Маск открил измама во агенција за која рече дека ја водат „радикални левичарски лудаци“.
Набргу по враќањето на Трамп во Белата куќа, Маск и ДОГЕ добија пристап до системите за плаќање и електронска пошта на УСАИД, замрзнаа многу плаќања и на голем дел од персоналот му кажаа дека се ставени на одмор.
Во соопштението на државниот секретар Марко Рубио се вели дека Стејт департментот во петокот го известил Конгресот за својата намера да ја реорганизира УСАИД, додавајќи дека агенцијата „одамна отстапила од својата првична мисија“.
– Благодарение на претседателот Трамп, оваа погрешна и фискално неодговорна ера сега заврши. Ги преориентираме нашите програми за странска помош за да ги усогласиме директно со она што е најдобро за САД и нашите граѓани“, рече Рубио.
Во објава на X, Џереми Кониндик, поранешен функционер на УСАИД, кој сега е претседател на Меѓународната организација за бегалци, го нарече потегот „целосна абдицирање на децениското американско лидерство во светот“.