Израелската војска денеска издаде наредби за опсежна евакуација што го покрива поголемиот дел од Рафах, што укажува на можноста за започнување нова голема копнена операција во најјужниот град во Појасот Газа, пренесува АП.
Израел го прекрши примирјето со милитантната група Хамас претходно овој месец и продолжи со воздушни и копнени напади.
На почетокот на март го прекина снабдувањето со храна, гориво, лекови и хуманитарна помош за околу 2 милиони Палестинци во Газа со цел да изврши притисок врз Хамас да ги прифати промените во договорот за прекин на огнот.
Наредбите за евакуација го опфатија речиси целиот град и околината.
Армијата им нареди на Палестинците да се преселат во Муваси, област со импровизирани шатори долж брегот.
Наредбите беа издадени за време на Еид ал Фитр, муслиманскиот празник со кој завршува постот Рамазан.
Израел лани во мај започна голема операција во Рафа, на границата со Египет, оставајќи големи делови од градот во урнатини.
Армијата потоа зазеде стратешки коридор долж границата и преминот Рафа со Египет, единствениот излез од Газа кој не е под контрола на Израел.
Шверц на оружје и потреба од негово спречување
Според договорот за прекин на огнот потпишан во јануари под притисок на САД, Израел требаше да се повлече од коридорот, но подоцна одби да го стори тоа, наведувајќи ја потребата да се спречи шверцот со оружје.
Израел вети дека ќе ги интензивира воените операции додека Хамас не ги ослободи преостанатите 59 заложници што ги држи – од кои 24 се верува дека се уште се живи.
Исто така, бара Хамас да го остави оружјето и да ја напушти територијата, кои не беа услови вклучени во договорот за прекин на огнот и кои Хамас ги отфрли.
„Израел ќе ја преземе одговорноста за безбедноста во Газа“
Израелскиот премиер Бенјамин Нетанјаху вчера изјави дека Израел ќе ја преземе одговорноста за безбедноста во Газа по војната и ќе го спроведе предлогот на американскиот претседател Доналд Трамп за преместување на населението од Газа во други земји, опишувајќи го како „доброволна емиграција“.
Палестинците едногласно го отфрлија планот затоа што го сметаат за принудно протерување од нивната татковина, а експертите за човекови права предупредуваат дека најверојатно ќе го прекрши меѓународното право.
Хамас инсистира на спроведување на потпишаниот договор, кој предвидува ослободување на преостанатите заложници во замена за траен прекин на огнот и израелско повлекување.
Преговорите за овие услови требаше да започнат во февруари, но беа одржани само прелиминарни разговори.
Војната започна кога милитантите предводени од Хамас го нападнаа Израел на 7 октомври 2023 година, напаѓајќи воени бази и земјоделски заедници и убивајќи околу 1.200 луѓе, главно цивили.
Потоа, милитантите зеле како заложници уште 251 лице, од кои повеќето подоцна биле ослободени за време на прекин на огнот или други договори.
Израелската офанзива резултираше со смрт на повеќе од 50.000 Палестинци, според Министерството за здравство на Газа, кое не наведува колку биле цивили или борци.
Во еден момент, војната раселени околу 90% од населението на Газа, при што многумина мораа да бегаат повеќе пати.
Големи делови од Газа се целосно уништени, а се уште не е јасно како и кога ќе започне обновата.