Портпаролот на израелската армија, контраадмирал Даниел Хагари, вечерва изјави дека елитната единица од поморски командоси и оклопна бригада извршиле рација во детската болница Рантиси во градот Газа, каде што се криеле оперативци на Хамас.
„Под болницата, во подрумот, го најдовме командниот и контролниот центар на Хамас, самоубиствени елеци, гранати, автомати АК-47, експлозивни направи, ракетни гранати (РПГ) и друго оружје“, рече Хагари на прес-конференција.
Тој исто така рече дека „најдени се знаци кои укажуваат на тоа дека Хамас држел заложници таму“, но дека сè уште се истражуваат и дека военото разузнавање треба да го потврди тоа.
„Покрај тоа, најдовме докази дека терористите на Хамас се вратиле од масакрот на 7 октомври во таа болница, меѓу другите, откако ги заклаа Израелците во нивните домови. Хамас се крие во болниците. Ќе му покажеме на светот“, најави воениот портпарол.
Хагари додаде дека израелската војска се обидува да обезбеди безбедна евакуација на пациентите во текот на изминатата недела од таа и од другите болници во Газа и дека најмалку 18 пациенти од Рантиси се евакуирани.
„Тоа е затоа што нашата војна е против Хамас, а не против народот на Газа. Особено не болни жени и деца“, рече Хагари.
Повеќе од две третини од 2,3 милиони жители на Газа ги напуштија своите домови од почетокот на војната.
Над 11.000 од нив загинале, меѓу кои две третини се жени и малолетни, според податоците на локалното министерство.