Израелскиот премиер Бенјамин Нетанјаху денес изјави дека им наложил на своите адвокати да го тужат израелскиот весник „Хаарец“ и неговиот новинар Шломи Елдар за, како што изјави, лажни тврдења дека претседателот на Обединетите Арапски Емирати (ОАЕ) го предупредил за планиран напад од страна на палестинската милитантна група Хамас неколку дена пред нападот извршен на 7 октомври 2023 година и дека не постапил врз основа на таа информација.
Нетанјаху тврди на платформата X дека немало телефонски разговор меѓу него и претседателот на ОАЕ, Мохамед бин Зајед, помеѓу почетокот на септември 2023 година и нападот на 7 октомври.
Нетанјаху, исто така, тврди дека таков разговор неизбежно би оставил јасна писмена трага, без тим од неговиот кабинет да пронајде таква документација.
„Ова е подла клевета, изнесена во момент кој беше внимателно избран од политички причини – како дел од изборната кампања на левицата – и ќе има уште вакви лажни обвинувања“, рече Нетанјаху, повторно тврдејќи дека нападот на Хамас на 7 октомври можел да биде спречен доколку, случајно, израелските безбедносни претставници го предупредиле за знаците на претстоен напад неколку часа пред да започне, пренесува Танјуг.
„Хаарец“ објави во вторник дека претседателот на Обединетите Арапски Емирати (ОАЕ), Мохамед бин Зајед, предупредил за планираниот напад на Хамас неколку дена пред нападот извршен на 7 октомври 2023 година.