Јавниот превоз во Холандија денес беше суспендиран поради национален штрајк организиран во знак на протест против предлозите на владата за намалување на трошоците за социјални бенефиции.
Речиси немаше воз, автобус или ферибот низ цела Холандија поради 24-часовниот штрајк кој ги погоди и меѓународните железнички линии до Белгија, Германија, Франција и Велика Британија, објави NL Times.
Синдикатите организираа штрајк во знак на спротивставување на владините планови за намалување на годишните трошоци за социјална помош за дури 6,5 милијарди евра (7,6 милијарди долари) – главно со ограничување на надоместоците за невработеност – за финансирање на големо зголемување на трошоците за одбрана.
Овој штрајк дополнително ја комплицира позицијата на холандската малцинска влада од десниот центар, формирана оваа година, која веќе се соочува со тешкотии во обезбедувањето усвојување на предлозите во двата дома на парламентот, објавува Танјуг.
Бидејќи нема мнозинство, на коалицијата ѝ е потребна поддршка од партии надвор од алијансата, а левичарската партија „Про“, која ја предводи опозицијата, застана на страната на синдикатите барајќи сите предлози за намалување на социјалните трошоци да бидат повлечени од постапката.
Во обид да добие поддршка, холандската влада веќе се откажа од планот за зголемување на возраста за пензионирање, а минатата недела се согласи да ги ублажи другите предлози.
Сепак, партијата „Про“ оцени дека тоа не е доволно, што создаде услови за продолжување на преговорите по официјалното претставување на владиниот буџет на 15 септември.