На почетокот на судењето за случајот „Тачи и останатите“ во Специјализираните совети на Косово во Хаг, поранешните лидери на Ослободителната војска на Косово, кои беа обвинети за воени злосторства и злосторства против човештвото, повторно се изјаснија за невини пред сите точки од обвинението, јавува Анадолија.
Одговарајќи на прашањето на судијата дали го разбира обвинението, кое беше делумно изменето од неговото прво признание за вина, поранешниот политички лидер на Ослободителната војска на Косово, Хашим Тачи, одговори:
„Разбирам. Воопшто не сум виновен“.
Исто така, Тачи ја потврди првата изјава пред судот дека не е виновен по сите точки од обвинението против него.
Другите обвинети во случајот, Кадри Весели, Реџеп Селими и Јакуп Красниќи, пак се изјаснија за невини според обвинението.
По исказите на обвинетите, Специјализираното обвинителство го започна воведното излагање, за што му беа одобрени најмногу пет часа.
Потоа воведниот говор ќе го прочита претставникот на жртвите, кој има на располагање 45 минути.
После тоа, секој од четирите тимови од одбраната ќе има можност да даде воведна изјава. Нивната презентација е закажана за 4 април.
Хашим Тачи, Кадри Весели, Реџеп Селими и Јакуп Красниќи се обвинети за десет точки, шест за злосторства против човештвото, додека четири за воени злосторства.
Секој од обвинетите се товари врз основа на индивидуална кривична одговорност во шест точки за злосторства против човештвото: прогон, затвор, други нехумани дела, тортура, убиства и присилно исчезнување на лица.
Покрај тоа, секој од обвинетите се товари за четири точки од обвинението за воени злосторства, и тоа: незаконско и самоволно апсење и лишување од слобода, сурово постапување, тортура и убиства.
По апсењето од страна на специјализираниот обвинител, Тачи, Весели, Селими и Красниќи беа донесени во притворот на Специјализираните совети на Косово во Хаг на 4 и 5 ноември 2020 година.
Тачи, кој тогаш беше претседател на Косово, веднаш поднесе оставка од таа функција.