Палестински Хамас официјално ја презеде одговорноста за нападот на синагога во Ерусалим во кој загинаа седум лица, а тројца беа ранети.
Советот за безбедност на ОН едногласно го осуди овој чин.
Алкам Каири (21), напаѓачот кој отвори оган врз верниците кои излегуваа од синагога во северниот дел на источен Ерусалим, загина во судир со полицајци додека се обидуваше да избега.
Службата за вонредни состојби во Ерусалим првично соопшти дека се ранети десет лица, но таа бројка подоцна беше ревидирана на три.
Хамас официјално ја презеде одговорноста за нападот
Портпаролот на Хамас во Ерусалим Мухамед Хамада рече дека групата „го поздравува чинот, кој доаѓа како природен одговор на нападите врз џамијата Ал Акса“ и нападот на израелската армија врз бегалскиот камп Џенин во четвртокот, во кој загинаа девет Палестинци и 20 други беа ранети во престрелка.
„Палестинскиот народ никогаш нема да ги заборави своите маченици“, додаде Хамада.
Во меѓувреме, сите 15 земји-членки на Советот за безбедност на ОН го осудија терористичкиот напад во петокот во Источен Ерусалим во кој загинаа седум лица, а тројца беа тешко ранети, изјавија двајца дипломати на ОН за Тајмс оф Израел.
Седницата на ОН се одржа зад затворени врати, а претставниците на Израел и Палестина не беа поканети.
Седницата беше свикана еден ден порано поради нападот на израелската армија во бегалскиот камп Џенин на Западниот Брег на 26 јануари.
Обединетите Арапски Емирати, Кина и Франција повикаа на состанок на Советот за безбедност на ОН поради зголемените тензии меѓу Израел и Палестинците, но не е постигнат консензус за тоа како да се реши оваа последна ескалација на насилството.
Американскиот претставник на седницата рече дека Палестинците не треба да преземаат „еднострани мерки“ во ОН, а рускиот претставник изјави дека Москва ќе ја поддржи таквата палестинска иницијатива.
Портпаролот на ОН Стефан Дијарик објави дека генералниот секретар на ОН Антонио Гутереш е „длабоко загрижен“ од моменталната ескалација на насилството во Израел и окупираната палестинска територија и повика на воздржаност.
Гутереш остро го осуди нападот на синагогата во предградието на Ерусалим.