Американската филијала на јужнокорејската компанија Hyundai Motor, како и производителот на автомобили Stellantis и авиокомпанијата Delta Airlines, објавија дека ќе донираат по еден милион долари во фондот за инаугурација на новоизбраниот претседател на Соединетите Американски Држави Доналд Трамп.
„Хјундаи“ соопшти дека ја поздравува можноста да работи со новата претседателска администрација во Вашингтон на чекорите „кои го поддржуваат американското производство, ги штитат синџирите на снабдување и поттикнуваат иновации“.
Потенцијалното воведување тарифи и промени во субвенциите за електрични возила (ЕВ) што ги разгледува Трамп може да има „драматично влијание“ врз производителите на автомобили, пишува Ројтерс.
Инаугуративниот фонд на Трамп ќе добие или веќе доби средства од други големи компании како што се Боинг, Џенерал Моторс, Форд, Мајкрософт, Амазон, Алфабет и Мета.
Во Соединетите Американски Држави, победникот на претседателските избори назначува инаугуративен комитет за организирање и финансирање настани како што се церемонии на инаугурација и паради.
За разлика од директното придонесување во кампањата на кандидатот, нема ограничувања за тоа колку поединец или корпорација може да придонесе во инаугуративната комисија.
Трамп со години има тежок однос со големите технолошки компании и не бегаше од критиките на овој сектор по изборите.
Кон крајот на минатата година, тој сигнализираше дека не ја исклучува можноста за спроведување на антимонополските прописи, особено болна точка за Гугл во сопственост на Alphabet, објавија медиумите.