Денеска Франција ќе стане првата земја што ќе вклучи доброволно прекинување на бременоста во својот Устав, за разлика од многу земји каде ова право е ограничено.
Претставниците на двата дома на францускиот парламент – Сенатот и Националното собрание – ќе се соберат на церемонија во Версајската палата каде треба да го одобрат амандманот на Уставот предложен од владата.
Четири дена пред 8 март, Меѓународниот ден на правата на жената, со оваа реформа ќе се воведе реченицата – „Законот ги утврдува условите под кои се остварува слободата што им се гарантира на жената да прибегне кон доброволно прекинување на бременоста“ во член 34 од Уставот.
„Кога правата на жените се нападнати ширум светот, Франција застанува и се става на чело на напредокот“, изјави неодамна премиерот Габриел Атал.
Тоа ќе биде „првата уставна одредба толку експлицитна на оваа тема, не само во Европа, туку и во светот“, рече Леа Хоктор, експерт во Центарот за репродуктивни права, американска организација која го брани правото на абортус.
Според анкетите, вклучувањето на правото на абортус во Уставот го поддржуваат повеќе од 80 отсто од француското население.
Противниците на абортусот најавија митинг пред Версајската палата во текот на денот, додека поддржувачите на прекин на бременоста ќе се соберат на плоштадот Трокадеро. Тој митинг во Париз беше поттикнат од градските власти и организациите за правата на жените.
Абортусот беше легализиран во Франција во 1975 година, четири години по жалбата во која 343 жени, меѓу кои познатите актерки Жана Моро, Катрин Денев и писателите Симон де Бовоар, Маргерит Дирас (Маргерит Дурас) и Франсоа Саган (Франсоа) признаа дека абортирале. .