Францускиот премиер Себастијан Лекурни за денес свика конференција со претставници на синдикатите и работодавачите во неговата резиденција во Матињон, а фокусот на разговорот ќе биде барањето за зголемување на минималната плата.
Синдикатот CFDT бара зголемување на минималната нето плата за 100 евра, додека синдикатот CGT бара зголемување од 150 евра, објавува Фигаро.
Министерот за труд Жан-Пјер Фаранду изјави дека зголемувањето е можно под услов да не го загрозува вработувањето.
„Доколку се случи зголемувањето, би било важно минималната плата да ја надмине границата од 1.500 евра нето“, рече Фаранду, отворајќи ја со тоа можноста за минимално зголемување од 22 евра.
Минималната плата (SMIC) во Франција моментално изнесува 1.477,93 евра нето месечно.
Сепак, очекувањата од конференцијата не се големи, бидејќи во францускиот буџет нема доволно средства за значително зголемување на минималната плата.
Поранешен пратеник од редовите на политичкото движење на Емануел Макрон процени дека состанокот би можел да ги разочара синдикатите, бидејќи е тешко да се очекува дека зголемувањето од 1,6 проценти ќе биде претставено како победа.
„Владата се соочува со незадоволство кое не е без основа, но просторот за буџетски маневри е многу тесен“, рече сенаторот и претседател на партијата UDI, Ерв Марсеј.
Тој предупреди дека трошоците за евентуалните ветувања за минимална плата ќе ги сноси следната француска влада.
Дополнителна пречка е ставот на работодавачите, кои се против тоа владата еднострано да утврди зголемување на минималната плата.
Поранешниот француски премиер Едуар Филип рече дека одлуката за зголемување на минималната плата треба да биде единствен резултат на преговорите меѓу социјалните партнери, а не владина одлука.