Францускиот министер за национално образование Едуар Жефр објави дека денес 845 училишта и колеџи во таа земја ќе бидат затворени поради топлината.
Дополнителни 1.800 ќе ги прилагодат своите распореди за да ги сместат децата само во утринските смени.
Жефре рече дека училиштата и колеџите ќе останат затворени „главно во одделенијата под црвено предупредување“ поради топлината, објавува телевизијата BFM.
„Прво, постои правило дека постои континуитет на јавната служба, тоа е принципот. Потоа, постои систем на исклучоци, од моментот кога е веројатно дека безбедноста на персоналот или децата ќе биде доведена во прашање, таа мора да биде затворена“, рече Жефре.
Според податоците од Француската метеоролошка служба, се очекува топлотниот бран денес да се интензивира во таа земја, поради што 49 департмани прогласија црвено ниво на предупредување, додека портокалово ниво на предупредување е прогласено во 40, што во моментов е рекорден број департмани погодени од највисоките предупредувања за топлотен бран.
Според прогнозите на метеоролозите, денес во Франција се очекува максимална температура од 37 до 42 степени целзиусови, која „ќе се приближи или дури ќе ги надмине апсолутните рекорди (за сите месеци) во некои области“.
Се очекува екстремно високите минимални и максимални температури да продолжат и во наредните денови.
Францускиот претседател Емануел Макрон објави дека владата на земјата денес ќе одржи нов меѓуресорски кризен состанок поради топлотниот бран.
Макрон ги потсети граѓаните дека е важно да се следат сите препораки и да се биде внимателен.