Евреите сега сочинуваат помалку од 47 отсто од вкупното население западно од реката Јордан до Средоземното Море, предупреди израелскиот демограф Арнон Софер, тврдејќи дека поголемиот дел од израелското население не е свесно за демократската опасност во која влегува земјата, бидејќи „малцинството владее со мнозинството“.
Софер, кој предава географија на Универзитетот во Хаифа, изјави за Израелското воено радио дека покрај еврејското и арапското население, земал предвид и колку стотици илјади не-Евреи живеат во Израел и не се државјани на таа земја.
Во земјата на Израел, како што ја нарече тој, мислејќи на Израел, Западниот Брег и Појасот Газа, живеат 7,45 милиони Евреи и други, заедно со 7,53 милиони израелски Арапи и Палестинци.
Кога ќе се земат предвид оние кои не се државјани на Израел, има меѓу 46 и 47 проценти Евреи.
Според податоците на Централното биро за статистика на Израел, на крајот на минатата година во Израел живееле 9.449.000 луѓе, меѓу кои и Израелци во еврејските населби на окупираниот Западен Брег.
Од нив, 6.892.000 (74 отсто) се Евреи и 1,99 милиони (21 отсто) израелски Арапи, а 472.000 (пет отсто) се ниту едното, ниту другото, пренесува Бета.
Палестинското биро за статистика наведува дека нешто повеќе од три милиони Палестинци живеат на окупираниот Западен Брег, а околу два милиони во Појасот Газа, кој е под блокада на Израел.
Софер објасни дека иако наталитетот е поголем кај еврејската популација во последните години, стапката на смртност е исто така поголема, што значи дека арапското население, кое е многу помладо од еврејското население, расте побрзо.
Израелскиот професор исто така рече дека Израел е најгусто населената земја во западниот свет и ги наведе предвидувањата на Централното биро за статистика дека таму ќе живеат 35 милиони луѓе до 2065 година.