Европската комисија најави контрамерки како одговор на последниот бран американски царини воведени од претседателот Доналд Трамп.
Најголемо влијание досега доживеаја секторите на алуминиум и челик, но на удар се и автомобилите и широката палета на индустриски производи, пренесува Biznis.ba.
На 2 април Трамп објави нови трговски мерки со кои најави царини од минимум десет проценти за повеќето земји, додека царини од дури 20 проценти беа поставени за Европската унија и 34 проценти за Кина. Мерките стапуваат на сила на 9 април.
Иако останува неизвесно дали тарифите ќе останат постојани или само преговарачка алатка, нивниот ефект е непосреден – милијарди долари пазарна вредност испари од берзите ширум светот.
ЕУ подготвува одговор во координација со земјите-членки, а истовремено расте глобалното незадоволство.
Милиони граѓани во 50 американски сојузни држави и ширум светот излегоа на протест против економската политика на Трамп, но и против влијанието на Илон Маск, сметајќи ги за главни актери во дестабилизацијата на пазарите и институциите.