Девет лица загинаа во Сенегал во судирите меѓу полицијата и приврзаниците на опозицискиот лидер Усман Сонко, откако судот го осуди на две години затвор, со што се доведува во сериозен сомнеж неговите шанси да се кандидира за претседател следната година.
Сонко (48) не присуствуваше на вчерашното изрекување на пресудата за наводниот сексуален напад, а Министерството за правда соопшти дека лидерот на опозицијата сега може да биде одведен во затвор во секое време, пренесува Ројтерс.
Полицијата остана распоредена околу неговиот дом во Дакар, додека немирите се разгореа во главниот град и на други места по пресудата.
Сонко беше обвинет дека силувал и се заканил дека ќе убие жена која во тоа време имала 20 години и работела во салон за масажа во 2021 година.
Тој ја негира вината и вели дека обвиненијата се политички мотивирани.
Судот го ослободи Сонко од наводното силување, но го прогласи за виновен за посебно дело опишано во кривичниот законик како неморално однесување кон лица помлади од 21 година.