Американскиот милијардер Илон Маск уште еднаш ја потврди својата поддршка за Алтернатива за Германија (AfD) на претстојните парламентарни избори во Германија во разговор со претседателката на екстремно десничарската партија Алис Вајдел во четвртокот на платформата X.
„Како што веќе кажав јавно, мислам дека само АфД може да ја спаси Германија. Крај на приказната“, рече Илон Маск во разговор со лидерката на AfD, Алис Вајдел, што се емитуваше во живо на платформата X.
Тој укажа на победата на Доналд Трамп, кој дели десничарски популистички ставови со АфД, на претседателските избори во САД.
„Успехот на Трамп покажува дека граѓаните на САД сакаат промени. И мојата препорака до луѓето во Германија е да гласаат за промени доколку се незадоволни“, рече Маск.
This was so crazy! https://t.co/Ko5jun3JNI
— Elon Musk (@elonmusk) January 10, 2025
Маск во разговор со Вајдел се пожали на бирократијата во Германија.
„За да ја отворам мојата фабрика во Германија, морав да добијам 25.000 страници документи, цел камион и сите документи мораа да бидат со печат“, рече Маск.
Заменик-претседателката на AfD, Алис Вајдел, генерално изрази согласност со Маск за време на разговорот, особено кога станува збор за враќање на нуклеарната енергија во Германија.
Вајдел се огради од нацистичкиот лидер Адолф Хитлер.
„Тој беше комунистичко-социјалистички тип. Ние сме сосема спротивно од тоа – слободарско-конзервативна партија“, рече Вајдел.
Вајдел рече дека АфД, чии активности ги следи Канцеларијата за заштита на уставниот поредок поради нејзините екстремно десничарски ставови, е единствената гаранција за продолжување на еврејскиот живот во Германија.
„Сите други партии ги отворија границите за луѓето кои се потенцијално антисемитисти и кои вршат злосторства против Евреите во Германија“, рече Вајдел, алудирајќи на имиграцијата од земји како Сирија, Ирак и Авганистан во последниве години.
Вајдел повторно ја критикуваше поранешната канцеларка Ангела Меркел за нејзината имиграциска политика и ја нарече „првата зелена канцеларка“ поради нејзината одлука да ги затвори нуклеарните централи.
Застапувањето на Маск за АфД наиде на остри критики од германските политички партии, а администрацијата на Бундестагот истражува дали се работи за незаконско финансирање на партиите.
Според германските медиуми, разговорот помеѓу Илон Маск и Алис Вајдел на платформата X го следеле околу 200.000 луѓе.