Американскиот државен секретар Eнтони Блинкен во петокот го осуди нападот на вооружен напаѓач на периферијата на Ерусалим во близина на синагога во кој загинаа седум лица, а повеќе беа ранети, а нападот го осудија и Обединетите нации, Велика Британија, Обединетите Арапски Емирати…
„САД силно го осудуваат страшниот терористички напад што се случи пред синагога во Ерусалим“, рече Блинкен, кој наскоро треба да отпатува во регионот, се вели во соопштението.
„Ние сме во близок контакт со нашите израелски партнери и ја потврдуваме нашата непоколеблива посветеност на безбедноста на Израел“, рече Блинкен.
Нападот го осуди и генералниот секретар на ОН, Антонио Гутереш, кој е „длабоко загрижен“ од моменталната ескалација на насилството во Израел и окупираната палестинска територија.
Затоа, во петокот повика на „најголема воздржаност“, изјави портпаролот на ОН Стефан Дужарик.
Обединетите Арапски Емирати (ОАЕ) го осудија нападот во петокот врз синагога во предградие на Ерусалим, објави државната новинска агенција ВАМ, повикувајќи се на соопштение на израелското Министерство за надворешни работи.
Седум лица загинаа, а десет се повредени во петокот во напад на синагога во близина на Ерусалим, соопшти израелското Министерство за надворешни работи.
Британскиот министер за надворешни работи Џејмс Клеверли исто така го осуди нападот.
„Да се напаѓаат верниците во синагога на Денот на сеќавањето на Холокаустот и за време на Шабат е ужасно. Ние стоиме со нашите израелски пријатели“, рече тој во изјавата на Твитер.