Американскиот милијардер и филантроп Бил Гејтс изјави дека неподготвеноста за вакцинација во богатите земји значи дека во моментов не е можно да се стави крај на сипаниците како глобална закана за јавното здравје.
Коосновачот на Мајкрософт изјави во интервју за Ројтерс дека искоренувањето на сипаниците претходно била можна цел на неговата фондација, која се фокусира на глобалното здравје и најсиромашните луѓе во светот.
Но, таа цел сега е напуштена поради растечката неподготвеност за вакцинирање во побогатите земји, рече Гејтс.
„Во еден момент, фондацијата сакаше да ги искорени сипаниците, но поради неподготвеноста за вакцинирање во богатите земји, тоа повеќе не е на нашата листа на цели. Мислам дека тоа е малку трагично“, рече Гејтс.
Сипаниците се една од најзаразните болести во светот и предизвикуваат висока температура, кашлица и карактеристичен осип.
Пред воведувањето на вакцината во 1960-тите, вирусот одземаше животи на околу два милиони деца годишно.
Денес, околу 100.000 деца умираат од оваа болест годишно, претежно во земји каде што конфликтите или логистичките проблеми ја отежнуваат имунизацијата.
Светската здравствена организација наведува дека стапката на вакцинација мора да биде над 95 проценти за да се спречат епидемии.
Сепак, во последните години се забележува зголемување на бројот на случаи во земјите каде што болеста беше речиси заборавена, вклучувајќи ги САД и Европа, поради намалувањето на стапките на вакцинација.
Гејтс рече дека неподготвеноста за вакцинирање не се проширила во земјите со пониски приходи, каде што сипаниците можат да бидат многу посмртоносни поради неухранетост и недостатоци во здравствениот систем.
Тој зборуваше пред годишниот настан „Голкиперс“ на фондацијата, кој го следи напредокот кон глобалните развојни цели на Обединетите нации за 2030 година, вклучувајќи ги и целите поврзани со подобрување на здравјето.
Во минатогодишниот извештај, Гејтс предупреди на последиците од намалувањето на меѓународната помош, иницирано од администрацијата на американскиот претседател Доналд Трамп, а потоа проследено од други богати земји, како што се Обединетото Кралство и Германија.
Тој рече дека оваа година, намалувањата на финансирањето веројатно предизвикале многу смртни случаи, но враќањето на дел од финансирањето спречило најлошото сценарио.
„Не очекуваме да се остварат најлошите прогнози, кои предвидуваа повеќе од 10 милиони смртни случаи. Ситуацијата е сè уште многу трагична“, рече Гејтс, додавајќи дека продолжува да ги повикува владите да ја обноват помошта или барем да не ја намалуваат дополнително.