Поранешниот италијански премиер Силвио Берлускони раскажа како разменувал писма и подароци со рускиот претседател Владимир Путин, беше објавено во аудио снимка во еден италијански дневен весник.
Со објавувањето на записите, се изразува загриженост дека новата владејачка коалиција во земјата би можела да биде под притисок одвнатре да ја ублажи својата поддршка за Украина.
„Путин ми испрати 20 шишиња вотка и многу слатко писмо за мојот роденден“, рече Берлускони (86) во аудио снимката од неговиот говор на состанокот со претставниците, што во вторникот беше објавена на интернет од италијанскиот дневен весник LaPresse.
Не е прецизирано кога е снимено видеото, иако роденденот на Берлускони беше на 29 септември.
Поранешниот премиер и лидер на партијата Форца Италија рече дека му испратил на рускиот претседател „подеднакво слатко писмо“ и неколку шишиња вино Ламбруско.
Во видеото Берлускони вели и дека е „многу загрижен“ поради изјавите на руските министри дека Италија е „во војна со нив бидејќи испорачува оружје и ја финансира Украина“.
Портпаролот на Форца Италија веднаш негираше дека Берлускони го обновил контактот со Путин, велејќи дека тој „на пратениците им прераскажува стара приказна од пред неколку години“.
Новоизбраната десничарска коалиција во Италија, предводена од Џорџа Мелони, формира влада и преговара за местата во кабинетот со Берлускони и другите сојузници.
Новата премиерка рече дека поддржува испраќање помош и оружје за Украина и изрази солидарност со претседателот Володимир Зеленски.
Партијата на Берлускони, исто така, издаде соопштение во кое се вели дека ставот на Берлускони за Украина е „познат на сите и е во согласност“ со ставот на Европа и САД.
„Овој став се повторуваше во многу јавни прилики. Има и никогаш немало простор за нејаснотии“, се наведува во соопштението.
Сепак, веќе имаше знаци дека Мелони може да се соочи со внатрешен притисок да го омекне нејзиниот став кон Русија.
Во изјавата емитувана на националната телевизија во вторникот, претседателот на Претставничкиот дом, Лоренцо Фонтана, рече дека санкциите против Русија би можеле да бидат „бумеранг“.
Фонтана, кој е член на партијата Лига, е познат по своите проруски ставови.