Американскиот претседател Џозеф Бајден ќе одобри дополнителна безбедносна помош од 250 милиони долари за Украина, изјави денеска американскиот секретар за одбрана Лојд Остин на почетокот на состанокот на Контакт групата за одбрана на Украина во воената база Рамштајн во Германија.
„Тоа ќе го зголеми капацитетот за задоволување на потребите на Украина во развој. И ние ќе ги испорачаме (според потребите) на војната“, рече тој.
Украинскиот претседател Володимир Зеленски денеска повторно ги повика сојузниците да ги игнорираат „црвените линии“ наметнати од Москва и да му дозволат на Киев да користи западно оружје со долг дострел за напади на руска територија, пренесува Ројтерс.
„Ние треба да ги имаме овие долгорочни способности не само на територијата на Украина, туку и на територијата на Русија, со цел Русија да биде мотивирана да бара мир“, рече украинскиот лидер.
На отворањето на состанокот, Зеленски изјави и дека Русија изгубила 6.000 војници во регионот Курск, кој украинските сили го нападнаа на 6 август.
Украинскиот претседател во Рамштајн ќе има одвоени средби со германскиот канцелар Олаф Шолц, италијанскиот премиер Џорџа Мелони, како и со италијански претприемачи.
Зеленски ќе се сретне и со министрите за одбрана на САД и Германија, Лојд Остин и Борис Писториус, пренесува Укринформ.
„Ги координираме позициите со сите сојузници на Г7“, рече тој.
Според заменик-портпаролот на американското Министерство за одбрана, Сабрина Синг, учесниците на состанокот на коалицијата во формат Рамштајн денеска особено ќе се фокусираат на зајакнување на капацитетите за воздушна одбрана на Украина и активирање на одбранбените индустрии на земјите учеснички.
Ова е првпат Зеленски да се приклучи на состанокот на група од околу 50 нации кои ја снабдуваат Украина со оружје, пренесува Танјуг.
Од почетокот на војната во февруари 2022 година, земјите-членки на Контакт групата обезбедија околу 106 милијарди долари безбедносна помош за Украина.
САД независно обезбедиле повеќе од 56 милијарди долари, наведува британската агенција.