Американскиот претседател Џо Бајден најави дека Федералната влада ќе ги плати сите трошоци за обнова на мостот Френсис Скот Ки во Балтимор, кој се урна во вторникот откако во него удри брод, пренесува Хина, повикувајќи се на Ројтерс.
„Мојата намера е Федералната влада да ги плати сите трошоци за реконструкција на тој мост и очекувам Конгресот да ме поддржи“, рече Бајден во Белата куќа.
Голем контејнерски брод удри во мост додека го напуштал Балтимор рано во вторникот, по што автомобилите и луѓето паднале во реката и го затвориле едно од најпрометните источни американски пристаништа.
Потрагата по исчезнатите
Спасувачите извлекоа двајца преживеани, од кои еден е хоспитализиран, а потрагата по други во студената вода на реката Патапско продолжува.
„Знам дека во тие околности секоја минута изгледа како вечност“, им рече Бајден на оние кои се уште чекаат информации за најблиските исчезнати во несреќата.
Американскиот претседател нагласи дека операцијата за пребарување е „највисок приоритет“. Тој судирот на бродот со мостот го нарече „страшна несреќа“.
Запрашан зошто властите ќе платат за реставрација иако операторот на бродот е виновен за несреќата, Бајден рече дека не сакаат да ги чекаат.