Двајца американски војници беа нападнати во понеделникот во Измир во западна Турција, а на интернет се појави драматично видео на кое се гледа како еден од војниците е опкружен со толпа која му става вреќа преку глава среде бел ден.
Сè наликува на киднапирање, објави „Дејлимејл“.
Американската амбасада во Турција потврди дека двајца припадници на војската биле жртви на нападот во Измир и сега се на безбедно.
Нападнатите војници биле дел од екипажот на американскиот воен брод „USS Wasp“, кој по завршувањето на обуката на море се укотвил во пристаништето во Измир.
Канцеларијата на гувернерот на Измир изјави за Ројтерс дека членовите на Турската младинска унија (ТБГ), младинското крило на националистичката опозициска партија Ватан, нападнале двајца американски војници, кои биле во цивилна облека, во областа Конак.
Наскоро дошло до голем инцидент кога пет американски војници интервенирале да ги одбранат своите колеги. Набрзо интервенирала и полицијата. Сите 15 напаѓачи се приведени и покрената е истрага.
„Ние им ставаме вреќи на американските војници кои служат на најголемиот воен брод“, се вели во видеото на групата.
„Американските војници, кои на раце ја носат крвта на нашите војници и илјадници Палестинци, не можат да ја осквернат нашата земја. Секогаш кога ќе стапнете во овие земји, ние ќе ве пречекаме како што заслужувате“, се наведува и во соопштението.
Американските власти се уште не ја потврдиле автентичноста на видеото.
„Им благодариме на турските власти за нивната брза реакција и тековната истрага“, се вели во соопштението на американската амбасада во Турција.
Воениот брод USS Wasp е распореден во областа Европа-Африка на поморските сили за да ги поддржи САД и нивните сојузници и да продолжи да промовира регионална стабилност и да ја одвраќа агресијата, според Службата за дистрибуција на визуелни информации за одбрана.
Американската војска го зголеми своето присуство во Средоземното Море поради зголемените тензии на Блискиот Исток поради војната во Газа.