Адвокатите на Хантер Бајден напишаа во поднесувањето на судот дека обвинителите се откажале од договорот за признавање вина на Хантер Бајден, синот на американскиот претседател Џо Бајден, за даночно затајување и прекршоци за оружје, што го отвора патот за судење додека Џо Бајден води кампања за претседателската функција.
Федералните обвинители во Делавер изјавија дека Хантер Бајден би можел да се соочи со кривична пријава по прекинот на преговорите за признавање вина, пренесе Хина, цитирајќи Ројтерс.
Окружниот судија Мерилен Нореика го отфрли предложениот договор за признавање вина во јули, наведувајќи ја неговата сомнителна законитост и степенот на имунитетот што му се нуди на Хантер Бајден.
Според договорот, Хантер Бајден би се изјаснил за виновен за затајување данок на доход од 1,5 милиони долари помеѓу 2017 и 2018 година и склучил посебен договор за одложено гонење за незаконско поседување огнено оружје додека бил под влијание, што е кривично дело.
Дополнителни овластувања за обвинителот Вајс
Случајот стана политичко прашање бидејќи републиканците во американскиот Конгрес отворија можност за отповикување на претседателот Џо Бајден поради деловните зделки на неговиот син Хантер Бајден и обвинување на Министерството за правда дека му понудил повластен договор.
Американскиот државен обвинител Мерик Гарланд ги отфрли републиканските обвинувања за фаворизирање и во петокот му додели статус на специјален обвинител на државниот обвинител Дејвид Вајс, назначен од поранешниот претседател Доналд Трамп и кој го истражува случајот од 2019 година, давајќи му дополнителни овластувања.
Ако случајот оди на суд, тој би можел да се поклопи со претседателската кампања во која Џо Бајден ќе се натпреварува за втор мандат на изборите во ноември 2024 година, веројатно против Трамп.
Републиканецот Трамп следната година ќе се соочи со три свои кривични судски процеси.