Високиот функционер на Северна Кореја, Ким Сонг Нам, се сретна во Пекинг со високи претставници на Комунистичката партија на Кина, а разговорите беа посветени на зајакнување на билатералните односи и проширување на соработката меѓу двете земји, објави денес севернокорејската KCNA.
Ким, член на Политбирото и секретар на Централниот комитет на Работничката партија на Кореја, се сретна во државниот комплекс Дјаојутаи со Лиу Хејксинг, раководител на Одделот за меѓународна соработка на Централниот комитет на Комунистичката партија на Кина (КПК).
За време на разговорот, Ким го запозна кинескиот функционер со она што тој го нарече „успеси“ на Пјонгјанг во градењето на партијата и истакна дека целата земја вложува напори за постигнување на целите на петгодишниот план усвоен на 9-тиот Конгрес на Работничката партија на Кореја во февруари.
Лиу оцени дека посетата е значајна за зајакнување на односите меѓу двете земји, според KCNA.
Соговорниците ја потврдија својата поддршка за политиките еден на друг и изразија подготвеност за продлабочување на соработката, а по состанокот, Кина организираше прием за севернокорејската делегација.
KCNA во посебен извештај објави дека Ким во петокот се сретнал и со Цаи Чи, член на Постојаниот комитет на Политичкото биро на Комунистичката партија на Кина и директор на Генералната канцеларија на тоа тело.
На состанокот, Ким ја повтори посветеноста на Пјонгјанг на зајакнување на билатералните врски, додека Цаи оцени дека посетата на кинескиот претседател Си на Северна Кореја во јуни им даде на односите „ново значење во духот на времето“.
Тој истакна дека посветеноста на Кина на пријателството со Северна Кореја нема да се промени „без оглед на постојаните промени во меѓународната ситуација“.