Во Демократска Република Конго во петокот, првото лице прими експериментална вакцина против смртоносниот вирус Бундибугио, еден од соевите на вирусот ебола, објавија Универзитетот во Антверпен и Институтот за тропска медицина, чии тимови учествуваат во работата на терен.
Станува збор за клиничка студија во која ќе бидат тестирани неколку експериментални вакцини, објавува фламанскиот јавен сервис VRT.
Неколку кандидати ќе бидат оценети истовремено како дел од истражувањето.
Во моментов нема одобрена вакцина против најновиот сој на вирусот ебола.
„Оваа студија претставува важен чекор во одговорот на непосредните потреби на погодените заедници“, рече Стив Ахука-Мундеке, координатор за одговор на ебола во државата.
Тој рече дека приоритет е да се запре преносот на вирусот и да се спасат животи, а воедно да се усогласи истражувањето со потребите на тимовите на првата линија.
Берн-Томас Њангва, локалниот директор на организацијата „Лекари без граници“, рече дека ова е „клучен чекор“.
„Соработката со заедниците е од суштинско значење за градење доверба и обезбедување учество во развојот на вакцини што ќе им бидат достапни на оние на кои им се најпотребни“, рече Њангва.
Од почетокот на епидемијата во мај, вирусот Бундибугио се прошири од ДР Конго во Уганда, Франција и Кенија, а на 20 октомври беше потврден првиот случај во Нигерија.
Ширењето на ебола надвор од Демократска Република Конго ја зголеми загриженоста на здравствените власти за можноста за брзо пренесување на реткиот вирус Бундибугио, кој инфицирал повеќе од 9.000 луѓе и одзел повеќе од 4.300 животи, пренесува Танјуг.