Референдумот за продолжување на преговорите за пристапување на Исланд кон Европската Унија се одржува денес, а анкетите покажуваат дека исходот од гласањето во таа земја со речиси 400.000 жители би можел да биде многу близок, бидејќи кон средината на август анкетата на Галуп покажа дека 51,5 проценти од анкетираните се за продолжување на преговорите, објавува Политико денес.
Исланѓаните гласаат „за“ и „против“ на прашањето: „Дали треба да се обноват преговорите за пристапување на Исланд кон ЕУ?“
Поранешниот исландски премиер и лидер на Центристичката партија, Сигмундур Давид Гунлаугсон, изјави за бриселскиот портал дека дури и позитивен исход од референдумот за продолжување на преговорите за пристапување кон ЕУ не би значел дека тие преговори автоматски ќе започнат.
Тој исто така верува дека формулацијата на прашањето е нејасна и дека властите не објасниле како би постапиле во случај на победа на оние кои се за продолжување на процесот на преговори.
Исланд ја повлече својата апликација за членство во ЕУ во 2015 година по долготрајни спорови, особено околу квотите за риболов, а Гунлаугсон беше премиер во тоа време, потсетува Политико.