Млад Португалец е убиен во туристичкиот град Ксамил на југот на Албанија, а полицијата привела 11 лица во врска со случајот, вклучувајќи ги и вработените во еден од баровите на плажа таму.
20-годишен државјанин на Португалија, кој престојувал во Албанија како турист, бил пронајден мртов на лежалка на плажа пред ресторан во популарниот туристички град Ксамил.
Според албанските медиуми, младиот човек претходно бил избоден со нож.
Главниот осомничен за убиството, 29-годишен маж, бил уапсен во градот Леван, северно од Ксамил.
Полицијата го пронашла како се крие во багажникот на автомобил управуван од 31-годишен турски државјанин.
Во возилото бил и уште еден 38-годишен турски државјанин.
Двајцата се уапсени на лице место под сомнение дека се соучесници во злосторството, објави албанската јавна телевизија RTSH.
Според РТШ и Топ Ченел, вкупно 11 лица се уапсени како дел од истрагата.
Инцидентот, според полицијата и објавен од страна на албанските медиуми, започнал во вторник, 18 август, околу 5:15 часот наутро во барот „Принсипоте“, по што конфликтот продолжил на плажата пред барот „Парадајс“.
Освен главниот осомничен, жртвата наводно била нападната од друг маж кој сè уште е во бегство, како и од четворица келнери кои работеле во барот.
Полицијата го бара и сопственикот на барот „Парадајс“, кој, според истрагата, го напуштил местото на настанот без да го пријави инцидентот.
Посебно внимание на истражителите привлекува фактот дека меѓу членовите на обезбедувањето имало и лица кои извршувале јавни функции – еден полицаец, вработен во затворската служба и еден комунален полицаец.
Уапсените лица се соочуваат со разни кривични пријави. Главниот осомничен и неговиот наводен соучесник се обвинети за убиство, додека келнерите, обезбедувањето и сопственикот на барот се обвинети за непружање помош.
Полицискиот службеник се соочува и со дополнително обвинение за недавање помош во ситуација на нарушување на јавниот ред.
Албанските медиуми наведуваат и дека главниот осомничен имал претходни проблеми со законот.
Тој бил уапсен и осуден во Велика Британија во 2024 година за трговија со дрога.
Истрагата за околностите на конфликтот и смртта на млад португалски државјанин е во тек, објави CNN Portugal.