Јапонските спасувачи продолжија да бараат можни преживеани во уништениот трговски центар во четврток, додека бројот на жртви од силниот земјотрес се искачи на 28. Илјадници жители се соочуваат со екстремно високи температури во исто време.
Владата на Јапонија објави нов број на жртви, додека властите на префектурата Кумамото објавија дека извлекле уште четири тела од урнатините на трговскиот центар „Еон“.
Се претпоставува дека по земјотресот во вторник, дошло до експлозија на гас што дополнително ја уништила зградата.
„Извлековме десет лица од трговскиот центар. Четворица беа потврдени мртви, едно лице не покажуваше знаци на живот, додека други петмина се здобија со сериозни и полесни повреди“, изјави за АФП функционер од службата за управување со катастрофи во југозападна Јапонија.
Земјотресот со јачина од 7,1 степени по Рихтер што ја погоди земјата во вторник предизвика широко распространето уништување.
Бројни куќи беа срушени, мостови беа оштетени, избувнаа пожари, а десетици илјади жители останаа без електрична енергија и вода.
Метеоролозите прогнозираат температури до 38 степени целзиусови за викендот.
Стотици постари лица, во земја со едно од најстарите популации во светот, ја поминуваат ноќта на тенки простирки во лобито на општинскиот центар во градот Уки, обидувајќи се да најдат засолниште од неподносливата топлина.
„Фала му на Бога што постојат овие засолништа“, рече една жена која не сакаше да биде идентификувана. Луѓето спијат меѓу маси и столчиња или гледаат вести собрани околу телевизорот.
Таа рече дека се обидела да остане дома или да ја помине ноќта во својот автомобил, „но е премногу жешко и има премногу комарци“.
„Без електрична енергија и климатизација, овој вид топлина е речиси невозможно да се издржи“, рече Хиројуки Мацушима (53), вработен во супермаркет и татко на четири деца.
Избегната трагедија
Трговскиот центар беше евакуиран веднаш по земјотресот, но околу 50 минути подоцна, катастрофална експлозија целосно ја уништи зградата. Во тој момент, непознат број вработени сè уште беа внатре.
Претприемачот Фумихико Мацура (56) рече дека само една недела претходно го гледал најновиот филм од серијата „Приказна за играчките“ во трговскиот центар.
„Бев тука. Буквално бев тука пред неколку дена“, изјави тој за АФП. „Се чувствувам како за малку да избегнав трагедија.“
Снимките одвнатре ги прикажуваат спасувачите во портокалови заштитни одела и бели шлемови како се борат низ испреплетени челични конструкции, висечки кабли и срушени делови од таванот.
Во фабриката „Нипон пејпер индастрис“ во градот Јацуширо, пет лица се потврдени како мртви, додека се бараат уште четворица. Дел од високиот црвено-бел оџак се срушил за време на земјотресот, потврдил за АФП владин претставник.