Ескалацијата на конфликтот меѓу Израел и Иран во последните 24 часа го стави претседателот на Соединетите Американски Држави, Доналд Трамп, под притисок да спречи поширока војна и да ја зачува стабилноста на Блискиот Исток.
Изминатите 24 часа јасно го покажаа ризикот Соединетите Американски Држави повторно да бидат вовлечени во големи воени операции на Блискиот Исток, и покрај желбата на претседателот Доналд Трамп да се повлече од тој конфликт, пишува американскиот портал Аксиос.
Во драматичен развој на настаните во понеделник, Трамп успеа да го одврати Израел од понатамошни напади, иако останува нејасно колку долго ќе трае примирјето.
Сто дена од конфликтот, Трамп сè уште не успеа да обезбеди договор за прекин на војната и ги помина последните 24 часа обидувајќи се да спречи нејзина ескалација.
Соединетите Држави се најдоа во сложена позиција. Од една страна, Трамп разбра дека израелскиот премиер Бенјамин Нетанјаху ќе мора да одговори на иранските напади. Од друга страна, тој се плашеше од ширење на конфликтот во регионална војна.
Во телефонски разговор со Аксиос, Трамп потврди дека го предупредил Нетанјаху дека ако војната со Иран продолжи, Израел може да остане без американска поддршка.
Ескалацијата започна по израелскиот напад врз цели на Хезболах во Бејрут. Според изворите, израелската армија ја информирала Американската централна команда (CENTCOM) за нападот, но не и Белата куќа, што предизвика незадоволство во Вашингтон.
Потоа Иран испали ракети кон Израел, предизвикувајќи понатамошни меѓусебни напади. Ситуацијата брзо ескалираше.
Трамп разговараше со Нетанјаху во неделата вечерта и побара Израел да не возвраќа, додавајќи дека може самиот да го преземе водството на операциите против Иран ако преговорите не успеат.
Според американските претставници, разговорот бил помирен од претходниот, кога Трамп наводно остро го критикувал Нетанјаху.
Сепак, израелскиот премиер проценил дека одговорот на иранскиот напад не може да се избегне, по што наредил нови напади.
Израел погоди повеќе цели во Иран, вклучувајќи ги и петрохемиските постројки, што довело до нови ирански ракетни напади врз Тел Авив.
Во следните часови следеа нови циклуси на напади и контранапади, со закана од поширока војна. Американската војска не учествуваше во нападите, но помогна во пресретнувањето на ракетите.
Трамп подоцна изјави дека добил повици од неколку земји во регионот со кои се бара прекин на конфликтот, како и пораки од Иран за подготвеност за прекин на огнот.
На крајот од кризата, Трамп повторно го контактираше Нетанјаху и побара прекин на нападите, предупредувајќи дека Израел не може да смета на автоматска поддршка од САД.
Нетанјаху на крајот се согласи да ги прекине операциите доколку Иран не ги продолжи нападите.
Трамп тврди дека Иран сака договор за нуклеарната програма, додека Техеран вели дека не им верува на САД и дека целта е да се заврши војната, а не да се нормализираат односите.
Аналитичарите проценуваат дека интересите на Вашингтон и Тел Авив се повеќе се разликуваат, особено во однос на понатамошниот тек на конфликтот.