Австралија во петокот објави дека новите американски тарифи немаат смисла и дека владата е разочарана од одлуката за зголемување на постојните тарифи за таа земја од 10 на 12,5 проценти, а бразилската влада исто така се спротивстави на новите тарифи.
„Според наше мислење, навистина нема смисла“, изјави австралискиот министер за одбрана Ричард Марлес за радиото ABC.
Од петок, американската администрација воведува нови тарифи од 10 и 12,5 проценти за стоки од 60 трговски партнери, вклучувајќи ги и оние од Европската Унија, поради недоволно строга примена на забраната за принудна работа, и тоа во моментот кога истекува примената на привремената глобална тарифа од 10 проценти.
Овој потег е најновиот обид на Белата куќа да ја оживее предизборната визија на претседателот Доналд Трамп за речиси универзални тарифи, откако Врховниот суд на САД ги поништи неговите „реципрочни“ тарифи во опсег од 10 до 50 проценти во февруари.
Овие царини претходно беа воведени според вонредното законодавство насочено кон намалување на трговскиот дефицит на САД.
Австралискиот министер за трговија, Дон Фарел, рече дека новите царини од страна на САД се „целосно неоправдани“ и дека ќе продолжи да врши притисок врз американските трговски претставници да ги отстранат сите царини за австралиските стоки.
Владата на Бразил, исто така, ги отфрли царините што ги воведоа САД врз јужноамериканската земја и 59 други трговски партнери, нарекувајќи го потегот „целосно произволен“ и „неоправдан“.
„Бидејќи не постои правна основа во домашното законодавство за поддршка на нејзината протекционистичка трговска политика, Канцеларијата на трговскиот претставник на САД одлучи да манипулира со прашање од големо значење за човековите права и движењето за работнички права“, рекоа тие од Бразил, чиј извоз во САД ќе биде оданочен со стапка од 12,5 проценти од петок.
Бразил објави дека веднаш ќе покрене постапки за активирање на механизмите за одговор предвидени во неговиот „Закон за реципроцитет“ и дека ќе го однесе случајот до механизмот за решавање спорови на Светската трговска организација.