Соединетите Американски Држави и Данска водат интензивни разговори за можното проширување на американското воено присуство во Гренланд, потврдија неколку извори запознаени со преговорите.
Според американски и дански претставници, разговорите постигнале значителен напредок во последните месеци.
Според информации од дипломатски кругови, Вашингтон размислува за отворање три нови воени бази на југот од Гренланд, автономна територија што ѝ припаѓа на Данска.
Овие преговори доаѓаат по претходните изјави на американскиот претседател Доналд Трамп, кој предизвика бурни реакции кога рече дека САД треба да го „поседнат“ Гренланд за да се спречи ширењето на руското и кинеското влијание на Арктикот.
Уште во јануари, Трамп рече дека преземањето на Гренланд од страна на САД може да се случи „на полесен или потежок начин“.
Белата куќа потврди дека администрацијата е во разговори со Данска и властите на Гренланд, но деталите не се официјално откриени.
Претставник на Белата куќа изјави за Би-Би-Си дека преговорите „одат во добра насока“ и дека постои оптимизам за можен договор.
Данските власти претходно изјавија дека се подготвени да разговараат за дополнително американско воено присуство во Гренланд, а данското Министерство за надворешни работи потврди дека комуникацијата меѓу двете земји е во тек.
Според извори блиски до преговорите, американската страна предложила договор со кој трите нови воени бази ќе имаат статус на суверена територија на САД.
Планирано е базите да бидат лоцирани на југот на Гренланд, со главен фокус на следење на можните руски и кинески поморски активности во Северниот Атлантик, помеѓу Гренланд, Исланд и Велика Британија.
Сепак, конечниот договор сè уште не е постигнат, а бројот на планирани бази би можел да се промени за време на преговорите.
Една од можните локации е Нарсарсуак, каде што порано имало американска воена база и мал аеродром.
Аналитичарите веруваат дека и други бази би можеле да бидат лоцирани на локации кои веќе имаат основна инфраструктура, како што се пристаништа и аеродроми, што би ги направило трошоците за изградба значително пониски.
Дипломатските активности ги води Мајкл Нидам од Стејт департментот, кој се обидува да ги усогласи барањата на Трамп со обврските на Данска поврзани со територијалниот суверенитет.
Договорот од 1951 година им дава на САД широк пристап до воени дејствија во Гренланд, но секое ново проширување мора да биде одобрено од данската влада.
Експертите за безбедност на Арктикот наведуваат дека Данска досега никогаш не одбила американско барање за зајакнување на своето воено присуство на територијата.